கனடாவில் தற்போது ‘பால் இழப்பீடு’ (Milk Settlement) என்ற பெயரில் பொதுமக்களை ஏமாற்றும் புதிய வகை இணைய மோசடி ஒன்று தீவிரமாகப் பரவி வருகிறது. அலைபேசிகளுக்கு வரும் குறுஞ்செய்திகளில், மக்கள் குறிப்பிட்ட இழப்பீட்டுத் தொகையைப் பெறத் தகுதியுள்ளதாகக் கூறி, ஒரு போலி இணையதள இணைப்பை மோசடிக்காரர்கள் அனுப்புகின்றனர். இந்த இணைப்பைச் சொடுக்கும்போது, அது அரசாங்க இணையதளத்தைப் போன்றே வடிவமைக்கப்பட்ட ஒரு போலித் தளத்திற்கு அழைத்துச் செல்கிறது.
ஒன்டாரியோவைச் சேர்ந்த டான் ஸ்டோன்மேன் மற்றும் கிறிஸ் ஹெர்மன் ஆகியோர் இந்த மோசடி குறித்து தங்கள் அனுபவங்களைப் பகிர்ந்துள்ளனர். இணையதளங்கள் நம்பகத்தன்மையுடன் காணப்பட்டாலும், அவை கடன் அட்டை விவரங்களைக் கேட்கும்போது மோசடியை உணர்ந்ததாக அவர்கள் தெரிவித்துள்ளனர். இணைய பாதுகாப்பு நிபுணர் டெர்ரி கட்லர் கூறுகையில், மோசடிக்காரர்கள் மின்னஞ்சல் மற்றும் தொலைபேசி எண்களைத் திரட்டி, இது போன்ற போலிச் செய்திகளைப் பெருமளவில் அனுப்புவதாகக் குறிப்பிடுகிறார்.
கனடிய மோசடி தடுப்பு மையத்தின் தரவுகளின்படி, 2022 ஆம் ஆண்டு முதல் கனடியர்கள் மோசடிகளால் 2.4 பில்லியன் டாலர்களுக்கும் அதிகமான பணத்தை இழந்துள்ளனர். சட்டத்தரணி லிண்டா விஸர் இது குறித்து விளக்குகையில், முறையான இழப்பீட்டுத் திட்டங்கள் ஒருபோதும் குறுஞ்செய்தி வழியாக வங்கி அல்லது கடன் அட்டை விவரங்களைக் கோர மாட்டாது என்று தெளிவுபடுத்தியுள்ளார். தேவையற்ற இணைப்புகளைத் தவிர்க்கவும், அதிகாரப்பூர்வ இணையதளங்கள் மூலம் தகவல்களை உறுதிப்படுத்தவும் பொதுமக்கள் கேட்டுக்கொள்ளப்படுகிறார்கள்.
