டொராண்டோ மேயர் தேர்தல் பிரச்சாரம் தீவிரமடைந்து வரும் சூழலில், தற்போதைய மேயர் ஆலிவியா சௌ புதிய தேர்தல் வாக்குறுதி ஒன்றை சனிக்கிழமை காலை வெளியிட்டுள்ளார். தாம் மீண்டும் தேர்ந்தெடுக்கப்பட்டால், டொராண்டோ பொது நூலகம் மூலமாக குடும்பங்களுக்கு வழங்கப்படும் கலாச்சார மற்றும் அருங்காட்சியக இலவச அனுமதிச் சீட்டுகளின் எண்ணிக்கையை அதிகரிக்க உள்ளதாக அவர் அறிவித்துள்ளார்.
இந்தத் திட்டத்தின் கீழ் மாதந்தோறும் கூடுதலாக 1,000 குடும்ப அனுமதிச் சீட்டுகள் டொராண்டோ மக்களுக்கு வழங்கப்படும் என்று சௌ தெரிவித்துள்ளார். 2007 ஆம் ஆண்டு தொடங்கப்பட்ட இந்த டொராண்டோ பொது நூலக அனுமதிச் சீட்டு திட்டம், ஒன்ராறியோ கலைக்கூடம், அகா கான் அருங்காட்சியகம், டொராண்டோ விலங்கியல் பூங்கா மற்றும் ராயல் ஒன்ராறியோ அருங்காட்சியகம் உள்ளிட்ட முக்கிய கலாச்சார மையங்களை மக்கள் இலவசமாகப் பார்வையிட அனுமதிக்கிறது. குடும்பத்துடன் அருங்காட்சியகம் செல்வதற்கு நுழைவுக் கட்டணமாக நூறு டாலர்களுக்கும் மேல் செலவாகும் சூழலில், இத்திட்டம் மக்களுக்குப் பெரும் உதவியாக இருக்கும் என்று அவர் குறிப்பிட்டுள்ளார்.
அதேசமயம், மேயர் வேட்பாளரான பிராட் பிராட்போர்ட் நார்த் யார்க் பகுதியில் செய்தியாளர்களிடம் பேசுகையில், இத்திட்டத்தை தாம் ஆதரித்தாலும் சௌவின் அறிவிப்பானது ராயல் ஒன்ராறியோ அருங்காட்சியகம் மற்றும் நூலக அறக்கட்டளையிடம் வைக்கும் ஒரு கோரிக்கை மட்டுமே என்று விமர்சித்துள்ளார். மேலும், இந்த அறிவிப்பு ஆலிவியா சௌவிடம் டொராண்டோவிற்கான புதிய சிந்தனைகள் எதுவும் இல்லை என்பதையே காட்டுவதாக அவர் சாடியுள்ளார். இதற்கிடையில், மற்றொரு வேட்பாளரான கிறிஸ் அலெக்சாண்டர் ஸ்கார்பாரோவில் மலிவு விலை வீடுகள் அமைப்பது தொடர்பான தனது திட்டங்களை முன்வைத்துள்ளார்.
