கனடாவின் ஹாலிஃபாக்ஸ் மற்றும் அதன் சுற்றுவட்டாரப் பகுதிகளில் கடந்த சில நாட்களில் மட்டும் பல்வேறு விதமான பண மோசடி புகார்கள் பதிவாகியுள்ளதாகக் காவல்துறை எச்சரிக்கை விடுத்துள்ளது. ஃபேஸ்புக் காதல் முதல் போலி முதலீட்டுத் திட்டங்கள் வரை பல உத்திகளைக் கையாண்டு மர்ம நபர்கள் பொதுமக்களின் பணத்தைத் திருடி வருகின்றனர்.
மிடில் சேக்வில் பகுதியைச் சேர்ந்த ஒருவர், ஃபேஸ்புக் மூலம் பழகிய நபர் ஒருவரின் மருத்துவச் செலவுகளுக்காகப் பணம் வழங்கி சுமார் 300,000 டொலர்களை இழந்துள்ளார். லேக்ஸைட் பகுதியில் பிரபலத்தின் முகத்தைப் பயன்படுத்திய போலி முதலீட்டு விளம்பரத்தை நம்பி ஒருவர் 25,000 டொலர்களைப் பறி கொடுத்துள்ளார்.
Eastern Passage பகுதியில் திரைப்பகிர்வு தொழில்நுட்பம் மூலம் வங்கி விவரங்களைத் திருடி 8,000 டொலர்கள் மோசடி செய்யப்பட்டுள்ளது. Head of Chezzetcook பகுதியில் வங்கி அதிகாரி போல் பேசிய நபர் 10,000 டொலர்களைத் திருடியுள்ளார். இது போன்ற மோசடிகளால் பாதிக்கப்பட்டவர்கள் 902-490-5020 என்ற எண்ணிற்கு ஹாலிஃபாக்ஸ் காவல்துறையைத் தொடர்பு கொள்ளுமாறு கோரப்பட்டுள்ளது.
