கனடாவின் வான்கூவர் பகுதியில் வரும் ஜூலை மாதத்தில் வெப்பநிலை கணிசமாக உயரும் என சுற்றுச்சூழல் மற்றும் காலநிலை மாற்றத் துறை எச்சரித்துள்ளது. கனடா தினத்தன்று லேசான மழைப்பொழிவு இருக்கக்கூடும் என்றாலும், அதனைத் தொடர்ந்து வரும் நாட்களில் வளிமண்டல மேலடுக்கு சுழற்சி காரணமாக வெப்பமான சூழல் நிலவும் எனத் தெரிவிக்கப்பட்டுள்ளது. வானிலை ஆய்வாளர் பிரையன் பிராக்டர் இது குறித்து கூறுகையில், ஜூலை மாதத்தின் தொடக்கத்தில் 22 டிகிரி செல்சியஸாக இருக்கும் வெப்பநிலை, மாதத்தின் நடுப்பகுதியில் 25 டிகிரி செல்சியஸ் வரை உயரக்கூடும் என்றார்.
ஜூலை மாதத்தின் சராசரி மழையளவான 34.1 மிமீ விடக் குறைவான மழையே எதிர்பார்க்கப்படுகிறது. மேலும், நகரின் கடற்கரைப் பகுதிகள் குளிப்பதற்கு ஏற்ற நிலையில் இருப்பதாக வான்கூவர் கடலோர சுகாதார அமைப்பு உறுதிப்படுத்தியுள்ளது. கனடா தினத்தை முன்னிட்டு பல்வேறு கலை நிகழ்ச்சிகள் மற்றும் ட்ரோன் காட்சிகள் நடைபெறவுள்ளதால், முக்கிய சாலைகள் மூடப்பட்டு போக்குவரத்து மாற்றங்கள் செய்யப்பட்டுள்ளன. பயணிகள் தங்கள் பயணங்களை முன்கூட்டியே திட்டமிடுமாறு அறிவுறுத்தப்படுகிறார்கள்.
