அமெரிக்காவிற்குள் நுழையும் பயணிகளின் கைபேசிகள் மற்றும் மின்னணு சாதனங்களை உரிய காரணமோ அல்லது வாரண்டோ இன்றியே எல்லைப் பாதுகாப்பு அதிகாரிகள் சோதனை செய்யலாம் என்று அமெரிக்க மேல்முறையீட்டு நீதிமன்றம் தீர்ப்பளித்துள்ளது. நியூயார்க் JFK விமான நிலையத்தில் சின்வெண்டு அலிசிக்வே என்பவரது தொலைபேசி சோதனையிடப்பட்ட வழக்கில், செப்டம்பர் 17 அன்று இரண்டாவது சுற்றுக்கான அமெரிக்க மேல்முறையீட்டு நீதிமன்றம் இந்த அதிகாரத்தை உறுதிசெய்துள்ளது. எல்லைப் பகுதியில் ஒரு பயணியின் உடைமைகளை ஆய்வு செய்வதற்கு எவ்வித சந்தேகமும் தேவையில்லை என்று நீதிமன்ற தீர்ப்பில் குறிப்பிடப்பட்டுள்ளது.
இதற்கு முன்னர் நடைமுறையில் இருந்த விதிகளின்படி, தீவிர ஆய்வுகளை மேற்கொள்ள அதிகாரிகளுக்குப் போதிய காரணம் அல்லது தேசிய பாதுகாப்பு தொடர்பான சந்தேகம் தேவைப்பட்டது. ஆனால் புதிய தீர்ப்பின்படி எவ்வித தடையுமின்றி அடிப்படை மற்றும் மேம்பட்ட ஆய்வுகளை அதிகாரிகள் மேற்கொள்ள முடியும். 2025 ஆம் ஆண்டில் எல்லை கடந்த 41 கோடியே 90 லட்சம் சர்வதேச பயணிகளில் 55,424 சாதனங்கள் மட்டுமே ஆய்வு செய்யப்பட்டிருந்தாலும், அமெரிக்கா செல்லும் கனடா நாட்டவர்கள் மிகுந்த எச்சரிக்கையுடன் இருக்க வேண்டும் என நிபுணர்கள் அறிவுறுத்துகின்றனர்.
எல்லையில் சோதனையை மறுக்கும் பயணிகளின் சாதனங்கள் பறிமுதல் செய்யப்படலாம் அல்லது அவர்கள் நாட்டிற்குள் நுழைய அனுமதி மறுக்கப்படலாம் என்று கனடா அரசும் தெளிவுபடுத்தியுள்ளது. அமெரிக்கா மற்றும் கனடா இடையே வர்த்தக வரி உள்ளிட்ட விவகாரங்களால் பதற்றம் நிலவி வரும் சூழலில், கனடாவிலிருந்து அமெரிக்காவுக்கான பயணங்கள் 25.4 சதவீதம் குறைந்துள்ளதும் குறிப்பிடத்தக்கது.
