கனடாவின் ஒன்டாரியோ மாகாணத்தில் உள்ள விண்ட்சர் மற்றும் அமெரிக்காவின் டெட்ராய்ட் நகரை இணைக்கும் தூதர் பால எல்லை சோதனைச் சாவடியில் பெரும் போதைப்பொருள் கடத்தல் முயற்சி முறியடிக்கப்பட்டுள்ளது. அமெரிக்காவில் இருந்து கனடாவுக்குள் நுழைந்த வணிக சரக்கு லாரி ஒன்றை கனடா எல்லைப் பாதுகாப்பு முகமை அதிகாரிகள் தடுத்து நிறுத்தி சோதனை மேற்கொண்டனர்.
அந்த வாகனம் தீவிர சோதனைக்கு உட்படுத்தப்பட்ட போது, எல்லைப் பாதுகாப்புப் பிரிவின் சிறப்பு மோப்ப நாய் உதவியுடன் சரக்குப் பெட்டகத்தில் ஆய்வு செய்யப்பட்டது. அதில் சட்டவிரோதமாக மறைத்து வைக்கப்பட்டிருந்த சுமார் 127 கிலோ கொக்கைன் போதைப்பொருள் கண்டுபிடிக்கப்பட்டு அதிகாரிகளால் உடனடியாகப் பறிமுதல் செய்யப்பட்டது.
இது தொடர்பாக மிசிசாகா நகரைச் சேர்ந்த வாசிஸ் கலிச்சின் மற்றும் அன்டன் செர்னிஷோவ்ஆகிய இருவர் சம்பவ இடத்திலேயே கைது செய்யப்பட்டனர். பறிமுதல் செய்யப்பட்ட போதைப்பொருட்களுடன் இருவரும் ராயல் கனடியன் மவுண்டட் காவல் துறையிடம் ஒப்படைக்கப்பட்டனர். அவர்கள் மீது தடைசெய்யப்பட்ட போதைப்பொருள் கடத்தல் மற்றும் விற்பனை நோக்குடன் வைத்திருத்தல் ஆகிய பிரிவுகளின் கீழ் வழக்குப் பதிவு செய்யப்பட்டு, விண்ட்சரில் உள்ள ஒன்டாரியோ நீதிமன்றத்தில் வழக்கு விசாரணை தொடங்கப்பட்டுள்ளது.
