கனடாவின் டொராண்டோ மாநகராட்சித் தேர்தலுக்கு இன்னும் ஒரு வாரத்திற்கும் குறைவான நாட்களே எஞ்சியுள்ள நிலையில், தேர்தல் களம் உச்சக்கட்ட பரபரப்பை எட்டியுள்ளது. தற்போதைய மேயர் ஒலிவியா சௌ மற்றும் பிராட் பிராட்போர்ட் ஆகிய இருவருக்கும் இடையிலான வாக்கு இடைவெளி பெருமளவில் குறைந்து, கடும் போட்டி நிலவுவதாக புதிய கருத்துக் கணிப்பு முடிவுகள் தெரிவிக்கின்றன.
‘நானோஸ் ரிசர்ச்’ நிறுவனம் அக்டோபர் 15 முதல் 18 வரை 762 டொராண்டோ வாக்காளர்களிடம் இந்த ஆய்வை மேற்கொண்டது. அதில், முடிவெடுத்த வாக்காளர்களில் ஒலிவியா சௌவிற்கு 49.8 சதவீத ஆதரவும், பிராட் பிராட்போர்ட்டிற்கு 46.6 சதவீத ஆதரவும் பதிவாகியுள்ளது. ஏனைய வேட்பாளர்களுக்கு 4 சதவீத ஆதரவு மட்டுமே கிடைத்துள்ளது. இந்த ஆய்வின் பிழை வரம்பு 3.6 சதவீதம் என்பதால், புள்ளியியல் அடிப்படையில் இருவரும் சமபலத்துடன் இருப்பதாகக் கருதப்படுகிறது.
கடந்த வாரத்துடன் ஒப்பிடுகையில் ஒலிவியா சௌவின் வாக்கு வங்கி ஒரு சதவீதம் சரிவடைந்துள்ளதுடன், பிராட்போர்ட்டின் ஆதரவு ஒரு சதவீதம் அதிகரித்துள்ளது. அக்டோபர் 26 அன்று வாக்குப்பதிவு நடைபெறவுள்ள நிலையில், இறுதிக்கட்ட நேரடி விவாதங்களும், வாக்காளர்களை வாக்குச்சாவடிகளுக்கு வரவழைக்கும் களப்பணிகளுமே வெற்றி தோல்வியை இறுதி செய்யும் காரணியாக அமையவுள்ளன.
