கனடாவின் வளமான எண்ணெய் வளங்களைக் கொண்ட அல்பெர்ட்டா மாகாணம், நாட்டின் பிற பகுதிகளிலிருந்து பிரிந்து செல்வது தொடர்பான வாக்கெடுப்பை நடத்தியது. இதில் பெரும்பான்மையான மக்கள் கனடாவுடன் தொடர்ந்து இருக்கவே ஆதரவு தெரிவித்துள்ளதாக முன்னணி ஊடகத் தகவல்கள் தெரிவிக்கின்றன.
வரலாற்றுச் சிறப்புமிக்க இந்த வாக்கெடுப்பில், அல்பெர்ட்டா மாகாணம் கனடாவுடன் தான் தொடர வேண்டும் என்று 76.4 சதவீத வாக்காளர்கள் ஆதரவாக வாக்களித்துள்ளனர். அதேவேளையில், மாகாணம் பிரிவது குறித்து சட்டப்பூர்வ வாக்கெடுப்பை நடத்த வேண்டும் என்று 23.6 சதவீத வாக்காளர்கள் மட்டுமே வாக்களித்துள்ளனர்.
குடியேற்றம் மற்றும் அரசியலமைப்பு மாற்றங்கள் தொடர்பான மீதமுள்ள ஒன்பது கேள்விகளுக்கான வாக்கு எண்ணிக்கையும் தற்போது தீவிரமாக நடைபெற்று வருகிறது. சில பிரிவுகளில் போட்டி மிகவும் கடுமையாக உள்ளதாகத் தெரிவிக்கப்பட்டுள்ளது. கடந்த ஒரு ஆண்டாக கனடா ஆதரவு மற்றும் பிரிவினைவாத குழுக்களுக்கு இடையே நடைபெற்று வந்த தீவிரப் பிரச்சாரத்திற்கு இந்த மகத்தான முடிவு முற்றுப்புள்ளி வைத்துள்ளது.
அல்பெர்ட்டா அரசாங்கம் முதல் ஒன்பது கேள்விகளுக்கு ‘ஆம்’ என்று வாக்களிக்குமாறு தீவிரப் பிரச்சாரம் மேற்கொண்டது. அதேவேளையில், மாகாணம் கனடாவுடன் தொடர்ந்து இருக்க வேண்டும் என்பதை பிரதமர் டேனியல் ஸ்மித் தொடர்ந்து வலியுறுத்தி வந்தார். இதனைத் தொடர்ந்து, செவ்வாய்க்கிழமை மாலை உள்ளூர் நேரம் 6:45 மணிக்கு அவர் அல்பெர்ட்டா மக்களிடையே உரையாற்ற உள்ளார்.
