ஒஷாவா பகுதியில் உள்ள ஹார்மனி ஹைட்ஸ் பொதுப் பள்ளிக்கு வியாழக்கிழமை மதியம் சுமார் 2 மணி அளவில் துப்பாக்கிச் சூடு மிரட்டல் விடுக்கப்பட்டது. இதன் விளைவாக அப்பள்ளி உடனடியாக பாதுகாப்பு வளையத்திற்குள் கொண்டு வரப்பட்டது. கே9 பிரிவு உள்ளிட்ட பல காவல்துறை பிரிவுகள் சம்பவ இடத்திற்கு விரைந்து தீவிர சோதனையில் ஈடுபட்டன. விசாரணையின் முடிவில், அது ஒரு போலி மிரட்டல் என்பது கண்டறியப்பட்டது.
இது தொடர்பாக 14 வயது சிறுவன் ஒருவனை டர்ஹாம் பிராந்திய காவல்துறை கைது செய்துள்ளது. அந்த சிறுவன் மீது குற்றவியல் துன்புறுத்தல், குறும்புத்தனம் மற்றும் உயிருக்கு ஆபத்து விளைவித்தல் உள்ளிட்ட பல பிரிவுகளின் கீழ் வழக்குப்பதிவு செய்யப்பட்டுள்ளது.
டர்ஹாம் காவல்துறைத் தலைவர் பீட்டர் மோரைரா இது குறித்து கூறுகையில், இத்தகைய செயல்கள் விளையாட்டு அல்ல என்றும், இவை பொதுமக்களிடையே தேவையற்ற அச்சத்தை உருவாக்கி காவல்துறையின் கவனத்தை உண்மையான அவசர நிலைகளிலிருந்து திசை திருப்புவதாகவும் எச்சரித்தார். மேலும், பெற்றோர்கள் தங்கள் குழந்தைகளுடன் இத்தகைய செயல்களின் விளைவுகள் குறித்து பேச வேண்டும் என்றும் அவர் வலியுறுத்தினார்.
