கனடாவில் மளிகைப் பொருட்களின் விலை முன்னெப்போதும் இல்லாத வகையில் அதிகரித்துள்ள சூழலில், பொதுமக்களின் பொருளாதாரச் சுமையைக் குறைக்கும் நோக்கில் ஜூன் மாதம் ஒருமுறை நிதியுதவி வழங்கப்படவுள்ளது. வரும் ஜூன் 5, 2026 அன்று தகுதியுள்ள நபர்களின் வங்கிக் கணக்குகளில் GST கடன் திட்டத்தின் கீழான கூடுதல் தொகை செலுத்தப்படும் என்று எதிர்பார்க்கப்படுகிறது.
பிரதமர் மார்க் கார்னி கடந்த ஜனவரி மாதம் அறிவித்த புதிய ‘கனடா மளிகை மற்றும் அத்தியாவசியப் பொருட்கள் சலுகை’ (CGEB) திட்டமானது, ஜூலை 2026 முதல் ஜிஎஸ்டி கடன் திட்டத்திற்கு மாற்றாக அமையும். 2024 ஆம் ஆண்டு வருமான வரித் தாக்கல் செய்து, ஜனவரி 2026 இல் GST கடனைப் பெற்றவர்கள் ஜூன் 5 அன்று இந்த ஒருமுறை கூடுதல் நிதியைப் பெறத் தகுதியுடையவர்கள் ஆவர்.
இந்த நிதியுதவியின் அளவு குடும்ப வருமானத்தைச் சார்ந்து அமையும். 25,000 டாலர் நிகர வருமானம் கொண்ட ஒரு முதியவர் 267 டாலர்களையும், 40,000 டாலர் வருமானம் கொண்ட ஒரு குடும்பம் 533 டாலர்களையும் பெறும். ஜூலை 3 முதல் தொடங்கும் புதிய திட்டத்தின் கீழ், அடுத்த ஐந்து ஆண்டுகளில் காலாண்டு கொடுப்பனவுகள் 25 சதவீதம் அதிகரிக்கப்படும். இதன் மூலம் 2026 ஆம் ஆண்டில் நான்கு பேர் கொண்ட ஒரு குடும்பம் மொத்தம் 1,890 டாலர்கள் வரை உதவி பெற முடியும் என்பது குறிப்பிடத்தக்கது.
