மரபணு சோதனை நிறுவனமான 23andMe-இன் தரவு கசிவு தொடர்பான கூட்டு நடவடிக்கை வழக்கில், பாதிக்கப்பட்ட கனடியர்களுக்கு இழப்பீடு வழங்கப்பட உள்ளது. கடந்த 2023-ஆம் ஆண்டு அக்டோபர் மாதம் நடந்த இந்தத் தரவு கசிவில் சுமார் 69 லட்சம் பயனர்களின் மிக முக்கியமான தனிப்பட்ட தகவல்கள் திருடப்பட்டதாகக் கூறப்படுகிறது.
இதனைத் தொடர்ந்து தொடரப்பட்ட வழக்கில், கனடா டாலரில் சுமார் 4.5 மில்லியன் மதிப்பிலான தீர்வுத் தொகைக்கு உடன்பாடு எட்டப்பட்டுள்ளது. 2023 மே 1 முதல் அக்டோபர் 1 வரையிலான காலகட்டத்தில் இந்தச் சேவையைப் பயன்படுத்திய கனடியர்கள் இதற்குத் தகுதியுடையவர்கள் ஆவர்.
பாதிக்கப்பட்டவர்கள் தகுந்த ஆதாரங்களைச் சமர்ப்பிப்பதன் மூலம் அதிகபட்சமாக 2,500 டாலர் வரை இழப்பீடு பெறலாம். இதில் மனநல ஆலோசனை அல்லது பாதுகாப்பு அமைப்புகளுக்காகச் செய்யப்பட்ட செலவுகளும் அடங்கும். ஆதாரங்கள் இல்லாதவர்கள் ஒரு குறிப்பிட்ட விகிதாச்சாரத் தொகையைப் பெற முடியும். விண்ணப்பிக்க ஜூன் 25, 2026 இறுதி நாளாக அறிவிக்கப்பட்டுள்ளது.
