உலகின் முன்னணி இணைய வர்த்தக நிறுவனமான அமேசான் மீது கனடாவின் கியூபெக் மாகாணத்தில் உள்ள நீதிமன்றத்தில் கூட்டுப் புகாராக ஒரு வழக்கு தாக்கல் செய்யப்பட்டுள்ளது. அமேசான் நிறுவனம் தனது தளத்தில் விற்கப்படும் பொருட்களின் விலையைச் செயற்கையாக உயர்த்தும் நோக்கில் விலை நிர்ணய மோசடிகளில் ஈடுபட்டதாக லெக்ஸ் குரூப் என்ற சட்ட நிறுவனம் குற்றம் சாட்டியுள்ளது. மற்ற இணைய வர்த்தகத் தளங்களில் பொருட்கள் குறைந்த விலைக்கு விற்கப்படும் போது, அந்த விற்பனையாளர்களை அமேசான் தொடர்பு கொண்டு விலையை மாற்றியமைக்க வற்புறுத்தியதாக நீதிமன்ற ஆவணங்கள் கூறுகின்றன.
அவ்வாறு செய்யாத விற்பனையாளர்களுக்குக் கடுமையான அபராதங்கள் விதிக்கப்படும் என்றும் அமேசான் எச்சரித்ததாகக் கூறப்படுகிறது. இதன் மூலம் கனடா மக்கள் குறைந்த விலையில் பொருட்களை வாங்கும் வாய்ப்பு பறிக்கப்பட்டுள்ளதாக இந்த வழக்கு கூறுகிறது. 2018 ஆம் ஆண்டு ஜனவரி 1 ஆம் தேதி முதல் அமேசான் கனடா அல்லது அமேசான் அமெரிக்கத் தளங்களில் பொருட்கள் வாங்கிய கனடா குடியிருப்பாளர்கள் இந்த வழக்கின் கீழ் இழப்பீடு பெறத் தகுதியுடையவர்களாகக் கருதப்படலாம்.
இருப்பினும், இந்த குற்றச்சாட்டுகளில் உண்மையில்லை என்றும், நீதிமன்றத்தில் இதனை எதிர்கொள்ளத் தயாராக இருப்பதாகவும் அமேசான் நிறுவன செய்தித் தொடர்பாளர் தெரிவித்துள்ளார். ஏற்கனவே கனடா போட்டி ஆணையம் அமேசான் நிறுவனத்தின் சந்தைப்படுத்தல் யுக்திகள் குறித்து விசாரணை நடத்தி வரும் நிலையில் இந்த புதிய வழக்கு பெரும் பரபரப்பை ஏற்படுத்தியுள்ளது.
