ஒன்டாரியோ முதல்வர் டக் போர்டு, கனடா பிரதமர் மார்க் கார்னிக்கு எழுதியுள்ள கடிதத்தில் பெட்ரோல் மற்றும் டீசல் மீதான மத்திய கலால் வரி குறைப்பை நீட்டிக்க வேண்டும் என்று வலியுறுத்தியுள்ளார். தற்போது அமலில் உள்ள இந்த வரி சலுகை வரும் செப்டம்பர் 7-ம் தேதியுடன் முடிவடைய உள்ள நிலையில், இதனை குறைந்தது ஜனவரி 1, 2027 வரை நீட்டிக்க வேண்டும் அல்லது நிரந்தரமான ஒன்றாக மாற்ற வேண்டும் என்று அவர் கோரியுள்ளார்.
ஈரான் போர் மற்றும் அமெரிக்காவின் வரி விதிப்புகளால் ஏற்பட்டுள்ள பொருளாதார நிச்சயமற்ற சூழலில், இந்த வரி குறைப்பு பொதுமக்களுக்கு மிக முக்கியமான நிவாரணமாக இருந்து வருகிறது. பெட்ரோல் லிட்டருக்கு 10 சென்ட் மற்றும் டீசல் லிட்டருக்கு 4 சென்ட் வரை இந்த சலுகை மூலம் மக்கள் பயனடைந்து வருகின்றனர். ஒன்டாரியோ மாநில அரசு ஏற்கனவே எரிபொருள் மீதான தனது மாநில வரியை நிரந்தரமாக ஒன்பது சென்ட்டாக குறைத்துள்ளதை அவர் சுட்டிக்காட்டியுள்ளார்.
இதே கோரிக்கையை கனேடிய எதிர்க்கட்சித் தலைவர் பியர் பொய்லிவ்ரேவும் முன்வைத்துள்ளார். அவர் பெட்ரோல் மற்றும் டீசல் மீதான ஜிஎஸ்டி வரியை ரத்து செய்ய வேண்டும் என்றும், கார்பன் வரியை நிரந்தரமாக நீக்க வேண்டும் என்றும் வலியுறுத்தி வருகிறார். பணவீக்கம் மற்றும் வாழ்க்கைச் செலவு அதிகரித்து வரும் சூழலில் மத்திய அரசு எடுக்கும் முடிவு கனேடியர்களிடையே பெரும் எதிர்பார்ப்பை ஏற்படுத்தியுள்ளது.
